Hjúkrunarheimili á Húsavík

Úr greinargerð:

Undir skógi vöxnum hlíðum Húsavíkurfjalls hefur nýju hjúkrunarheimili verið valinn staður við Heilbrigðisstofnun Norðurlands. Áskoranir og tækifæri felast í aðlögun að hlíðinni, aðliggjandi byggð, kröfum um tengingar við fyrirliggjandi byggingar og skapa heimilislegt og örvandi umhverfi.

Nýja hjúkrunarheimilið er vinkilbygging, sem er hvortveggja í senn samsíða og þvert á fjallshlíðina, tengist hornrétt við Dvalarheimilið Hvamm og myndar skjólgóð útisvæði.

Nýja hjúkrunarheimilið er á þremur hæðum fyrir ofan jarðhæð. 60 hjúkrunarrýmum er komið fyrir í 6 jafnstórum heimilum. Lögð er áhersla á heimilislegt umhverfi, góða vinnuaðstöðu og yfirsýn starfsfólks. Tvö heimili eru á hverri hæð, milli þeirra er tvískipt, sameiginleg vakt.

10 herbergi eru í hverju heimili. Íbúar njóta friðhelgi einkalífs í rúmgóðum herbergjum, sem uppfylla kröfur um algilda hönnun og aðstöðu til að taka á móti gestum.

Öll herbergi eru með svalir eða garð og þar með tækifæri til ræktunar og dýrahalds.